1946: கம்யூனிஸ்ட் கட்சியின் முதல் சட்டமன்ற வெற்றி!

1946-ஆம் ஆண்டு, தமிழக அரசியலில் ஒரு திருப்புமுனையாக அமைந்தது. கம்யூனிஸ்ட் கட்சி முதன்முறையாக சட்டமன்றத் தேர்தலில் போட்டியிட்டது. ஆனால், அந்தத் தேர்தல் முழுமையான ஜனநாயகத் தன்மையைக் கொண்டிருக்கவில்லை. சொத்து மற்றும் கல்வித் தகுதி உள்ளவர்களுக்கு மட்டுமே வாக்குரிமை வழங்கப்பட்டது. தொழிலாளர்களுக்கு மிகக் குறைந்த இடங்களே ஒதுக்கப்பட்டிருந்தன.

தேர்தலில் கம்யூனிஸ்ட் கட்சி

இந்தக் கட்டுப்பாடுகளுக்கு மத்தியிலும், நாடு முழுவதும் 108 வேட்பாளர்களை கம்யூனிஸ்ட் கட்சி நிறுத்தியது. தமிழகத்தில் பி.ராமமூர்த்தி, மணலி கந்தசாமி, பி.ஜீவானந்தம், கே.அனந்தநம்பியார் உள்ளிட்டோர் களத்தில் இறங்கினர்.

முதல் வெற்றி

ரயில்வே தொழிலாளர் தொகுதியில் போட்டியிட்ட கே.அனந்தநம்பியார், காங்கிரஸின் வி.கே.ஆதிகேசவலு ரெட்டியாரை 7,900 வாக்குகள் வித்தியாசத்தில் வெற்றி பெற்றார். 12,974 வாக்குகள் பெற்ற இந்த வெற்றி, தொழிலாளர் இயக்கத்திற்கு பெரும் உத்வேகத்தை அளித்தது. இதுவே கம்யூனிஸ்ட் கட்சியின் முதல் சட்டமன்ற வெற்றி.

மற்ற தொகுதிகளின் நிலை

மதுரையில் போட்டியிட்ட கம்யூனிஸ்ட் வேட்பாளர் சாந்துலால் 6,000 வாக்குகள் பெற்றார். பெரும்பாலான கைத்தறி நெசவாளர்களுக்கு வாக்குரிமை இல்லாத நிலையில், இது குறிப்பிடத்தக்க எண்ணிக்கை. இந்தியா முழுவதும் கம்யூனிஸ்ட் கட்சி எட்டு இடங்களை வென்றது. ரத்தன்லால் பிரம்மன், ஜோதிபாசு, ரூப்நாராயண் ராய் (வங்காளம்), எஸ்.ஏ.டாங்கே, ஷிவ் விஷால் (பம்பாய்), பில்லலமரி வெங்கடேஸ்வரலு (ஆந்திரா), அனந்தநம்பியார் (சென்னை), டி.ஜே.எம்.வில்சன் (ஆந்திரா) ஆகியோர் வெற்றி பெற்றனர். மொத்தம் பதிவான 26 லட்சம் வாக்குகளில் 5 லட்சம் வாக்குகளை (19%) பெற்றது சாதனை..

சட்டமன்றத்தில் கம்யூனிஸ்ட் உறுப்பினர்கள்

சென்னை சட்டமன்றத்தில் அனந்தநம்பியாரும், பில்லலமரி வெங்கடேஸ்வரலுவும் தொழிலாளர்கள் மற்றும் விவசாயிகளின் பிரச்சனைகளை துணிச்சலுடன் எழுப்பினர். ஆனால், ஓராண்டுக்குப் பிறகு அவர்கள் அடக்குமுறையால் தலைமறைவு வாழ்க்கைக்கும், சிறைக்கும் ஆளானார்கள்.

தேர்தலின் முக்கியத்துவம்

கட்டுப்பாடுகளுக்கு மத்தியிலும், முதல் தேர்தலிலேயே கம்யூனிஸ்ட் கட்சி தனது வலிமையை நிரூபித்தது. நாடாளுமன்ற ஜனநாயகத்தின் வழியிலும் மக்களுக்காகப் போராட முடியும் என்பதை காட்டியது.